فرح

انا دلعتك زيادة عن اللزوم وغلطت اني معملتلكيش وقفة من الأول خمس دقايق يا فرح خمس دقايق لو ملقتكيش قدامي برا صدقيني هتشوفي مني وش تاني
خرج وقفل الباب وراه لا رزعه رزعه جامد واټخضيت اية التدبيسة دي بقا انا مش مستعدة أقابله دلوقتي بس لو مطلعتش بابا هيقلب عليا
فرررح
نده عليا من برا بصوت عالي
حا حاضر يا بابا جاية

لبست وخرجت وانا بفرك في أيدي ومش عارفة اعمل اية ولا اقول اية لقيته قاعد في الصالون مشبك صوابعه في بعضها وعيونه مركزة على حتة معينة اول ما دخلت حس بيا ورفع عينه يبصلي كان بيبصلي بجمود وشوفته بيضغط على ايده اكتر عرفت أنه متعصب وعلى اخره هو في اية النهاردة كلهم على آخرهم كدا
هتفضلي واقفة عندك كتير
اتكلم بهدوء اتحول لسخرية
ولا مش طايقة تقعدي مع جوزك جوزك اللي ممرمطاه معاكي بقالك شهور سواء في البيت أو براه
فضلت ساكتة مبردش عليه
اية القطة اكلت لسانك ولا مش عارفة تبرري الهبل اللي بتعمليه
انت عايز اية يا قصي
عايز اعرف اخر اللى احنا فيه دا اية
معرفش
يعني اية متعرفيش احنا هنفضل كدا لحد امتى كل واحد فينا بعيد عن التاني
لوقت ما احس اني قادرة ارجع 
ليه ليه كل دا
ليه مش عارف ليه
عارف وعارف كمان اني غلطت وجيت لحد عندك مېت مرة عشان اراضيكي وترجعي معايا لكن كل مرة كنتي بتعاندي
عشان غلطك معايا كان كبير
وغلطك انتي كان اية
بصلي بنظرة ليها مغزى سكت لاني ملقتش كلام أقوله فعلا
سكتي يعني
قصي ريح نفسك انا
مش راجعة
سكت ف انا كمان سكت لحظة اتنين 
قام فجأة مسكني من دراعاتي الاتنين بعصبية ووقفني قدامه
انتي اية يا شيخة بتعملي فيا كدا ليه هونت عليكي مصعبتش عليكي خالص وانتي شايفاني كل يوم رايح جاي عليكي على أمل أنك تحني وترجعي انا لا بقيت عارف انام ولا اشتغل كل اللي شاغل دماغي انتي كل يوم كان بيبقى عندي أمل انك ترجعي معايا لكن كنتي بتقطعي الأمل دا بكل برود كل دا عشان غلطة عملتها غلطة واحدة بس مش عايزة تغفريها تحبي اقولك كام مرة غلطتي فيا وكنت بعدي وبستحمل عشان حبي ليكي وعشان عشرتنا مفتكرتيش ليا حاجة واحدة حلوة عملتهالك مفيش حاجة تشفعلي عندك خالص انتي اية انتي ايييييية
سابني ف وقعت على الكرسي حاولت امنع دموعي من انها تنزل لكن معرفتش
مش عايزة ترجعي معايا مترجعيش خليكي في بيت ابوكي خليكي فيه العمر كله
مشي قصي مشي يعني اية خليني فيه طول العمر يقصد اية هيبعد عني قصي هيبعد عني 
جريت على اوضتي واترميت على السرير فضلت اعيط لوقت طويل انا اية اللي جرالي اية اللي عملته فيه وفي نفسي دا اية اللي كان عاميني فضلت اعند طول الوقت وادوس عليه وعلى كرامته وانا فاكرة اني بعرفه قيمتي لكني طلعت غلطانة خربت بيتي خربت بيتي بأيدي 
الليل حل عليا وانا لسة زي منا محدش منهم دخل ليا ولا كلموني ليهم حق انا اصلا هقابلهم بأنهي وش سمعت تليفوني بيرن بس مردتش رن تاني ف مسكت التليفون ولقيت رقمه هو فتحت بسرعة وانا دموعي نازلة زي الشلال
الو
الو حضرتك مرات صاحب التليفون دا
قلبي اتقبض واټرعبت
ايوا ايوا انا في اية فين قصي
الاستاذ صاحب التليفون دا عمل حاډثة هو واتنين كمان وحاليا هو في مستشفى 
التليفون وقع من ايدي واترميت على الأرض نفسي قل وقلبي وجعني حاولت انده على اي حد منهم برا لكن معرفتش معرفتش اجمع الحروف 
معرفتش اعمل حاجة غير اني اصړخ بأسمه
يتبع 
يكفيني حبك 
نوري
الفصل الثالث
بجري بين طرقات المستشفى مش عارفة اروح فين بجري ودموعي على خدي وكل همي أوصله وبس اشوفه اطمن عليه واضمه ليا اطمنه اني موجودة جمبه وهو مش لوحده
رجلي مكانتش شيلاني لكني بعافر كنت كل شوية اقع وأقوم تاني واخبط في الناس المستشفى كانت مقلوبة بسبب الحاډثة
بيقولوا معظم اللي كانو في الحاډثة ماتوا دا غير اللي عندهم إصابات خطېرة
سمعت الجملة دي من ممرضة وهي بتجري على تحت اعصابي سابت و وقعت على الارض نفسي قل ودموعي هي هي منشفتش تنشف ازاي وحبيب القلب في خطړ حسيت بأيد حد بتقومني كان بابا من اللي انا فيه نسيت أنه كان معايا اول ما وصلت المستشفى نسيت الدنيا بحالها وجريت على جوا كل همي بس اشوفه
ب بابا قصي قصي يا بابا
اهدي يا بنتي اهدي إن شاء الله هنلاقيه بخير
الممرضة ال الممرضة بت بتقول 
هيبقى بخير ثقي في ربك هيبقى بخير صدقيني تعالي
سألنا واحدة من الممرضات عن اللي جم في الحاډثة وقالت أنهم في الطوارئ نزلنا لتحت وبابا ساندني دخلت الطوارئ ومقدرتش استحمل المنظر صوت شهقاتي علي وعياطي زاد بدور عليه بعيني ومش لقياه اټرعبت و أفكاري لعبت بيا معقول يكون خلاص مش هشوفه تاني انا انا لسة مشبعتش منه احنا بينا وعد وعد نعيش مع بعض لحد اخر نفس فينا يارب يارب متكونش دي النهاية بس لا لا انا قلبي حاسس بيه حاسة أنه بخير غمضت عيني وحطيت راسي بين ايديا ومفيش على لساني غير إن ربنا يدلني عليه
فرح قومي يا بنتي الدكتور بيقول إن قصي عايش
صوت أفكاري وقف رفعت راسي ابصله وانا مش مصدقة هز راسه بأة وابتسم قومت بسرعة ومسكت ايده
بجد يا بابا بجد قولي انك مش بتضحك عليا
عايش والله عايش الحمد لله وبخير
طب طب هو فين عايزة اشوفه
امسحي دموعك طب يا بنتي
اهو اهو متقلقش انا بقيت كويسة والله
مسحت على وشي وعلى عيوني من الدموع اللي متعلقة فيها بسرعة قالي أنهم نقلوه اوضة فوق بعيد عن الطوارئ من فرحتي ولهفتي ليه كنت بجري ومخدتش بالي اني لسة ماسكة ايد بابا وبجريه معايا غير لما لقيته بيكح يا حبيبي ميقدرش على كدا قعدته على كرسي ياخد نفسه ولقيته بيقولي على رقم الاوضة
اسبقيني انتي وانا هحصلك يلا يا حببتي روحي لجوزك
وافقته بدون كلام وكملت طريقي معرفش كنت بطلع ازاي مركبتش الاسانسير وطلعت على السلم دور في التاني وانا بجري وبسابق الزمن مكنتش مركزة في اي حاجة غير اني اوصل لاوضته وبس الممر كان طويل ومليان اوض وعيني على كل واحدة فيهم لحد ما لقيتها مستنتش وفتحت الباب على طول
اتسمرت مكاني من شكله كان دراعه ورجله متجبسين دموعي نزلت للمرة اللي مش عارفة عددها كان صوتي هيعلي ف حطيت ايدي على بوئي قربت منه وقعدت جمبه على السرير مكنش حاسس بالدنيا حواليه الظاهر إنهم عطوله مخدر عشان الۏجع لكن رغم كدا كان بيتوجع وبيأن صوته كان بيقطع في قلبي مسكت ايده السليمة براحة
سلامتك من الۏجع يا نور عيني يا ريتني اقدر أشيل عنك ولا اشوفك موجوع أبدا
الباب اتفتح ودخل بابا ومعاه دكتور ملامح بابا كان باين عليها الحزن وعيونه مدمعة اټخضيت وافتكرت إن قصي فيه حاجة
مالك يا بابا طمني عليه يا دكتور هو فيه حاجة
انتي مراته
ايوا 
طب كويس اني لقيت حد من اهله هو عمتا بخير الحمد لله وصحته كويسة هو بس كسر في الدراع الشمال والرجل اليمين وطبعا شوية خدوش في وشه
كل دا وبخير انت بتضحك عليا يا دكتور ولا اية
لو شوفتي باقي المصابين واصاباتهم واصلة لفين هتحمدي ربنا الف مرة على اللي جوزك فيه دا يعتبر الناجي الوحيد فيهم قولي الحمد لله أنه متوفاش زي الاتنين اللي كانو معاه في العربية
طب هو ليه مش حاسس بالدنيا من حواليه كدا
متنسيش إن الحاډثة مكنتش هينة برضو احنا اديناله مسكن للألم ومنوم عشان يقدر يرتاح شوية عموما هو هيحتاج يفضل معانا هنا كام يوم لحد ما نطمن عليه وبعدها نكتبله خروج إن شاء الله عن اذنكم
الټفت لبابا وانا مستغربة
هما مين دول اللي كانو معاه يا بابا
حماكي وحماتك يا بنتي
خرجت مني شهقة وانا مش مصدقة اللي بسمعه
لا إله إلا الله انت متأكد يا بابا
ايوا لما سألت عن قصي في الطوارئ وانتي سبقتيني لقيت دكتور جاي مع أمين شرطة وبيقوله اني اعرفه سألني اقربله اية ولما قولتله لقيته بيقولي إن كان معاه راجل وست في العربية بس مشوهين وملامحهم مش باينة لكنهم عرفوا هويتهم من بطايقهم اللي لقوها معاهم وطلعوا أبوه وأمه
لا إله إلا الله إنا لله وإنا إليه راجعون
شدي حيلك يا بنتي
الشدة على الله يا بابا طب هنعمل اية ولا هنتصرف ازاي
انا اتصلت بياسين اخوه وبلغته الخبر وزمانه جاي لكن مقدرتش أقوله على وفاتهم
هنقوله ازاي وقصي هيعرف ازاي دا كان روحه فيهم
أمر الله ونفذ انا هقول لياسين لكن جوزك مينفعش يعرف دلوقتي يفوق بس ونطمن عليه ويحلها ربنا انا خارج استنى ياسين برا
حقيقي حزنت علشانهم اوي كانو ناس طيبين وبيعاملوني كأني بنتهم واكتر صحيح حماتي اتغيرت لما اتأخرنا في الخلفة لكن كنت اوقات بعذرها قصي اول فرحتها ونفسها تشوف أولاده ومعاملتها الحلوة ليا قبل كدا خليتني اتغاضى عن اللي كانت بتقوله وعمي يا حبيبي كان طيب اوي وفي حاله دايما عمره ما زعلني ولا جيه عليا بالعكس كان بييجي في صفي على طول في اي خلاف بيني وبين قصي ربنا يرحمهم يارب ويصبرنا على فراقهم 
قعدت جمبه عشان لو صحي في اي وقت يا حبيبي مبطلش يإن من الۏجع لما هو كدا و واخد مخدر اومال لما المفعول يروح هيكون عامل ازاي سمعت الفجر بيأذن ف قومت اصليه دعيت ربنا يشفيه ويقومه ليا بالسلامة ومشوفش فيه حاجة وحشة تاني أبدا ويرحم والده و والدته ويصبرنا على فراقهم خلصت صلاة والباب اتفتح وكان ياسين ومعاه بابا وشه كان متغرق دموع وبينهج جري على قصي وقعد جمبه وفضل يعيط بحړقة ف عرفت إن بابا بلغه بالخبر
قصي قصي قوم انا مبقاليش حد في الدنيا بعد ربنا غيرك قوملي بالسلامة عشان خاطري متسبنيش انا متعودتش اكون لوحدي انت دايما معايا انت دايما بتقول عليا قوي ومش ضعيف لكن لكن دول أبونا وأمنا
عياطه زاد وعيطنا معاه الخبر صعب اوي علينا والحمل تقيل تقيل لكن هنعديه بلطف ربنا اكيد
بابا اخده في حضنه وفضل يطبطب عليه لحد ما هدي شوية
وحد الله يا ابني
لا إله إلا الله
اوعي تفكر انك لوحدك لا انا معاك كلنا معاك واخوك إن شاء الله هيقوم لينا بالسلامة وهيبقى بخير أنت زي ابني واكتر متقولش كدا تاني

ربنا يباركلنا فيك يا عمو
قوم نصلي الفجر في الجامع وبعدها نبدأ في الإجراءات
شد حيلك يا ياسين ربنا يصبرنا كلنا
يارب يارب
خرجوا وقعدت جمبه عشان لما يفوق الصبح طلع ولسة زي ما هو في دنيا