مريم وليد محمد. حواديت_مريم_وأدهم

صحبتي أنا علشان لوحدي فبتيجي تقعد معايا كل يومين.
كملت بأستغراب
ليه يا حبيبة قلبي فين أهلك..
اتنهدت بتعب وحاولت ارسم على وشي ابتسامة
ماما وبابا توفاهم الله وأنا مليش أخوات.
كملت بزعل
حقك عليا والله يا بنتي مش قصدي ربنا يرحمهم يارب يا حبيبتي وبعدين ما شاء الله شقتك زي الفل اللي يدخلها يحس ببهجة ربنا يبارك فيك..
ابتسمت بهدوء
أعملك قهوة
بصتلي وكملت
لأ مش النهارده بكره والعيال مش موجودين هدخلك.. أو تعاليلي أنت بقى.
حركت راسي بهدوء
خلاص اتفقنا..
قامت وقفت وكملت
طيب يلا يا حبيبتي أحسن ده وقت نوم أنا عارفة عن إذنك يا بنتي..
بصت لرحمة وكملت
عايزة حاجة يا حبيبتي
حركت راسها بلأ وكملت بابتسامة بشوشة
تسلم إيدك يا طنط.
الأمهات جميلة دايما قادرة تضيف بهجة وحب ودفء للمكان بتضيف حنية لأي حتة بتروحها.. كلمة حبيبتي عادية جدا لحد ما بتطلع من لسان أم.
صباح الخير.
كنت لابسة الجلافز وبخرج الژبالة على الباب علشان عمو محمد عامل النظافة
بيجي يشيلها ربنا يباركله والله.. لولاه مكنتش عارفة إيه اللي هيحصل.. لقيته واقف وخضني للمرة التانية كان لابس شروال رصاصي وتيشرت أسود وشعره مش متسرح أوي.. باين عليه أثار إنه لسه صاحي بصيت له وابتسمت
صباح النور عامل إيه
ابتسم بلطافة
أنت الحمدلله كويس.. بقيت كويسة
حركت راسي ب آه وكملت
أنا مش ناسية اللي عملته والله حقك عليا مكنتش مركزة.. بس بقولك إيه يا أدهم أنا عايزة أعرف جبت الحاجات اللي جبتها دي بكام
بصلي بأصرار وكمل
أنا قلتلك خلاص بجد وبعدين أحنا جيران يعني.. ومش ناويين نعزل فقاعدين سوا كتير إلا لو أنت اللي ناوية تمشي بقى..
بصيت له بأستنكار
ده بيتي همشي فين
تتجوزي!
ضحكت بسخرية وكملت
لأ يا شيخ! بعيدة حبة دي.. ده أنا لسه يدوب في مقتبل عمري ولسه بقول يا هادي.
بصلي بخبث
إيه ده عندك 20 سنة ولا إيه
اتنهدت وسندت جسمي على الباب وربعت إيدي وأنا بكمل
لو كنت من الأول سألتني عندي كام سنة وفي حياتي حد ولا لأ كنت قلتلك دايركت.. بس أنا هحترم الكريتيڤيتي اللي دخلت بيها وهجاوبك برضوا احتراما لبذل المجهود..
كملت وأنا بمسك الباب
عندي 24 سنة.. عن إذنك يا أدهم.
قفلت الباب وضحكت بإنتصار كان باين عليه من امبارح إنه عايز يفهم وكشخص بيدقق في التفاصيل جدا قدرت أفهم ده من أول ما بعت مامته.. ولد ذكي بيعرف يحدد خطواته يتكلم معايا.. يتعرف عليا.. يبدأ يدخل في التفاصيل الصغيرة.. وبعدين يخليني أحكيله خطة في منتهى الذكاء بس متنفعش مع حد شبهي الأوڤر ثينكينج مبهدلة والتفاصيل هي نظام حياتي حرفيا.
هو مهتم ليه يعرف
حركت راسي بعدم معرفة وأنا بلف البيض رول
فضول!
معتقدش الرجالة أوكيه فضوليين زينا.. بس مش تجاه أي حد إلا لو لفت إنتباههم!
كملت وأنا بخرج العيش من الميكرويڤ وبضحك بسخرية
الولد عسول بس ملفتتش إنتباهه.. هو اتخض ولما اتخض اثرت فضوله يا رحمة راجل.. ست.. فهو إنسان لولا فضول الإنسان مكنتش السيدة حوا أصرت ياكلوا من الشجرة اللي ربنا نهاههم عنها.
اتنهدت بزهق وهي بتخرج الاطباق وبتحط الحاجة على التربيزة معايا
أنا زهقت من تفسيراتك ليه مفيش حاجة بتتفسر عادي.. ليه تقعدي تحسبي واحد زائد واحد كام وهي في الأساس بتساوي أتنين!
كملت ببساطة وأنا بشد الكرسي
طيب ما ال 11 واحدين برضوا أنا لو مركزتش اللي قدامي واحد وواحد ولا واحدين وواحد هحسب غلط بفرق كبير يا رحمة!
الحياة أبسط من كده يا مريم ابسط من كده بكتير.
ابتسمت وأنا باكل
جايز بالنسبالك كل واحد فينا حسبته للحياة بتختلف.. ونظرته ليها كمان بتختلف.
أنا دايما نظرتي للحياة فعلا مختلفة عن الكل مش